- రేపో మాపో అరెస్టుకు రంగం సిద్ధం
- ఇది వరకే విచారణకు పిలిచిన పొలీసులు
కామారెడ్డి, బతుకమ్మ: కామారెడ్డి జిల్లా పోలీసులు ఇటీవల 500 వందల దొంగనోట్ల తయారీ చలామణి చేసే ముఠా గుట్టు రట్టు చేశారు. బిచ్కుంద మండల కేంద్రానికి చెందిన చిరు వ్యాపారీ దొంగనోట్లు చలామణి చేస్తుండగా పట్టుకున్నారు. హైదరాబాద్ కేంద్రంగా దొంగనోట్లను ముద్రిస్తున్న ముఠా సభ్యులను అదుపులోకి తీసుకుని అరెస్ట్ చేసిన విషయం తెలిసిందే. ఆ సమయంలో రూ.5 లక్షల మేర నకిలీ కరెన్సీని బిచ్కుం దలో చలామణి చేసినట్లుగా పోలీసులు గుర్తించారు. ఈ చలామణిలో కీలకపాత్ర ఎవరు పోషించారనే దానిపై పోలీసులు ఆరా తీయడం
ప్రారంభించారు. ఇందులో భాగంగా బిచ్కుంద మండలంలోని ఓ మాజీ ప్రజాప్రతినిధి అతడి అనుచరుడిని పోలీసులు అనుమానించి విచారణకు పిలిపించినట్లు తెలుస్తోంది. వీరిద్దరిని అరెస్ట్ చేసేందుకు రంగం సిద్ధం చేసినట్లు సమాచారం. ప్రస్తుతం ఈ అంశం జుక్కల్ నియోజకవర్గంలో చర్చనీయాంశంగా మారింది. మాజీ ప్రజా ప్రతినిధిని విచారణకు పిలిచిన విషయాన్ని ఓ పోలీస్ అధికారి ధ్రువీకరించారు. ఇప్పటికే ఈ కేసులో ఈనెల 14న ఆరుగురుని అరెస్ట్ చేసి రిమాండ్ కు తరలించారు. ఇప్పటికే ఈ కేసులో 60 లక్షల నకిలీ 500 నోట్లను పోలీసులు స్వాధీనం చేసుకున్నారు. నకిలీ నోట్ల చలామణితో జిల్లా ప్రజలు ఆందోళన చెందుతున్నారు.
