చెక్ డ్యాం వద్ద నీటి మట్టం పరిశీలిస్తుండగా గుండెపోటుతో ఏఈఈ మృతి కమ్మర్ పల్లి మండలంలో ఘటన
కమ్మర్పల్లి, బతుకమ్మ : చెక్ డ్యాంలో నీటి లెవెల్స్ తీసేందుకు తోటి సిబ్బందితో వెళ్లిన ఏఈఈ నితిన్ గుండెపోటుతో మృతి చెందారు. ఈఘటన కమ్మర్ పల్లి మండలంలో చోటుచేసుకుంది. వివరాల్లోకి వెళ్తే.. ఉన్నతాధికారుల ఆదేశాల మేరకు ఏఈఈ నితిన్ శుక్రవారం సాయంత్రం కమ్మర్పల్లి మండలం కోనాపూర్ గ్రామ శివారులోని రాళ్లవాగు చెక్ డ్యాములో నీటి లెవెల్స్ తీసేందుకు తోటి సిబ్బందితో కలిసి వెళ్లారు. ఈ క్రమంలో నీటిమట్టం పరిశీలిస్తుండగా.. నితిన్ ఒక్కసారిగా కుప్పకూలిపోయాడు. వెంటనే అప్రమత్తమైన సిబ్బంది ఆస్పత్రికి తరలించేలోపు మృతి చెందాడు. దీంతో సిబ్బంది విషాదంలో మునిగిపోయారు. సమాచారం అందుకున్న ఎస్సై అనిల్ రెడ్డి ఘటన స్థలాన్ని పరిశీలించారు. హైదరాబాద్కు చెందిన నితిన్ 2024 అక్టోబర్లో ఏఈఈగా ఉద్యోగం సాధించాడు. నితిన్కు నెల క్రితమే వివాహం జరగడం గమనార్హం.