. . . గుజరాత్ రాష్ట్రానికి తరలిస్తుండగా పట్టుకున్న పోలీసులు
. . . ముగ్గురిపై కేసు నమోదు
పిట్లం, బతుకమ్మ :
కామారెడ్డి జిల్లా పిట్లం మండల కేంద్రంలో పేదలకు చెందాల్సిన ప్రజా పంపిణీ వ్యవస్థ (రేషన్) బియ్యాన్ని అక్రమంగా తరలిస్తుండగా పిట్లం పోలీసులు చాకచక్యంగా పట్టుకున్నారు. హైదరాబాద్ నగర పరిసర ప్రాంతాల నుంచి గుజరాత్ రాష్ట్రానికి జాతీయ రహదారి మీదుగా సరుకు రవాణా వాహనంలో బియ్యం అక్రమ రవాణా జరుగుతోందని పోలీసులకు ముందస్తుగా నమ్మదగిన సమాచారం అందింది. ఈ సమాచారం ఆధారంగా పిట్లం ఎస్ఐ ఆంజనేయులు, పోలీస్ సిబ్బంది వెంకటేష్, రాజేశ్వర్లతో కలసి పిట్లం కూడలి సమీపంలోని పైవంతెన (ఫ్లైఓవర్) వద్ద తీవ్రస్థాయిలో వాహనాల తనిఖీలు చేపట్టారు. హైదరాబాద్ వైపు నుంచి నాందేడ్ వైపు వెళ్తున్న ఒక పెద్ద సరుకు రవాణా వాహనాన్ని అనుమానాస్పదంగా గుర్తించి ఆపి తనిఖీ చేశారు. తనిఖీల్లో భాగంగా వాహనంలో 632 ప్లాస్టిక్ సంచుల్లో భద్రపరిచిన సుమారు 30 టన్నుల రేషన్ బియ్యాన్ని గుర్తించి, బియ్యంతో పాటు వాహనాన్ని పోలీసులు స్వాధీనం చేసుకున్నారు. ఈ అక్రమ రవాణా ఘటనపై సమగ్ర విచారణ జరిపిన పోలీసులు, వాహన చోదకులు గుజరాత్ రాష్ట్రం సూరత్ జిల్లా బర్దోలికి చెందిన పర్బత్ కరంటా దేవరాజ్ (52), మహారాష్ట్రలోని ధూలే జిల్లాకు చెందిన శరద్ ఆబా బచ్కర్లతో పాటు, ఈ బియ్యాన్ని అక్రమంగా తరలిస్తున్న హైదరాబాద్ నివాసి ఇబ్రహీంపై చట్టరీత్యా కేసులు నమోదు చేసి దర్యాప్తు ప్రారంభించారు. ప్రజా పంపిణీ బియ్యం అక్రమ రవాణాను సమర్థవంతంగా అడ్డుకున్న పిట్లం ఎస్ఐ, పోలీస్ సిబ్బంది పనితీరును కామారెడ్డి జిల్లా పోలీస్ ఎస్పీ రాజేష్ చంద్ర ప్రత్యేకంగా ప్రశంసించి, అభినందనలు తెలిపారు. పేద ప్రజల కడుపు నింపడానికి ప్రభుత్వం సరఫరా చేసే రేషన్ బియ్యాన్ని అక్రమంగా విక్రయించినా, నిల్వ చేసినా లేదా సరిహద్దులు దాటించేందుకు ప్రయత్నించినా చట్టప్రకారం కఠినమైన చర్యలు తీసుకుంటామని ఈ సందర్భంగా పోలీసులు హెచ్చరించారు.