. . . ప్రభుత్వ సలహాదారు మహమ్మద్ షబ్బీర్ అలీ
కామారెడ్డి, బతుకమ్మ :
ప్రత్యేక ఇంటెన్సివ్ రివిజన్ (ఎస్ఐఆర్) ప్రక్రియలో అర్హులైన ఓటర్లు ఎవరూ జాబితా నుంచి తప్పిపోకుండా ఉండేందుకు గ్రామ, వార్డు, బూత్ స్థాయిల్లో ప్రత్యేక బృందాలను ఏర్పాటు చేసి ఇంటింటి సర్వే నిర్వహించాలని ప్రభుత్వ సలహాదారు మహమ్మద్ అలీ షబ్బీర్ పిలుపునిచ్చారు. గురువారం కామారెడ్డి పట్టణంలోని తన నివాసంలో ఎస్ఐఆర్ ప్రక్రియలో భాగంగా తన ఓటరు వివరాలను నమోదు చేయించుకున్న అనంతరం ఆయన మాట్లాడారు. అదనపు కలెక్టర్ (ఇన్చార్జి) పర్యవేక్షణలో అధికారులు ఈ ప్రక్రియను పూర్తి చేశారు. ఈ సందర్భంగా షబ్బీర్ అలీ మాట్లాడుతూ, ఓటు హక్కు ప్రజాస్వామ్యంలో అత్యంత విలువైన హక్కులలో ఒకటని పేర్కొన్నారు. ఓటరు జాబితాల సవరణ కార్యక్రమంలో కాంగ్రెస్ నాయకులు, కార్యకర్తలు, సర్పంచ్లు, వార్డు సభ్యులు, కౌన్సిలర్లు, బూత్ లెవల్ ఏజెంట్లు, బూత్ లెవల్ అధికారులు సమన్వయంతో పనిచేయాలని కోరారు. ఓటరు జాబితాల సవరణను పారదర్శకంగా నిర్వహించడం ఎన్నికల కమిషన్ (ఈసీఐ) మరియు అధికార యంత్రాంగం బాధ్యత అని ఆయన అన్నారు. ఎన్నికల ప్రక్రియపై ప్రజల్లో విశ్వాసాన్ని పెంపొందించేలా ప్రతి చర్య ఉండాలని సూచించారు. అర్హులైన, నిజమైన ఓటర్ల పేర్లు జాబితాల నుంచి తొలగించకూడదని షబ్బీర్ అలీ స్పష్టం చేశారు. అదే సమయంలో నకిలీ, అనర్హ ఓట్లను గుర్తించి తొలగించడం ద్వారా ఎన్నికల వ్యవస్థ మరింత పారదర్శకంగా మారుతుందని చెప్పారు. పార్టీ నాయకులు, కార్యకర్తలు ప్రతి ఇంటిని సందర్శించి బూత్ స్థాయిలో ఓటరు జాబితాలను పరిశీలించాలని సూచించారు. అలాగే 18 సంవత్సరాలు పూర్తిచేసుకున్న యువతీ యువకులందరికీ ఓటరు నమోదు చేయించేందుకు సహకరించాలని కోరారు. కొన్ని రాష్ట్రాల్లో ఓటరు జాబితాల నిర్వహణపై ప్రజాస్వామ్యవాద వర్గాలు ఆందోళనలు వ్యక్తం చేస్తున్న నేపథ్యంలో అధికారులు, రాజకీయ పార్టీలు అప్రమత్తంగా ఉండి ఓటరు జాబితాల పవిత్రతను కాపాడాలని అన్నారు. “ప్రజాస్వామ్యంలో ప్రతి ఓటుకు సమాన విలువ ఉంది. ఓటు హక్కును పరిరక్షించడం ప్రతి రాజకీయ పార్టీ, ప్రతి పౌరుడి బాధ్యత. అర్హులైన ఓటర్లు ఎవరూ జాబితా నుంచి తప్పిపోకూడదు. నకిలీ, అనర్హ ఓట్లను తొలగించడం ద్వారా ఎన్నికల ప్రక్రియ మరింత పారదర్శకంగా మారుతుంది” అని షబ్బీర్ అలీ పేర్కొన్నారు. ఈ కార్యక్రమంలో కాంగ్రెస్ పార్టీ నాయకులు, ప్రజాప్రతినిధులు, బూత్ లెవల్ ఏజెంట్లు, పార్టీ కార్యకర్తలు, అధికారులు పాల్గొన్నారు.
