నకిలీ ధృవీకరణ పత్రాల దందా భగ్నం

. . . ముగ్గురు అరెస్ట్

. . . నకిలీ రబ్బరు ముద్రలు, కంప్యూటర్ పరికరాలు, డిజిటల్ ఆధారాలు స్వాధీనం

కామారెడ్డి, బతుకమ్మ :

కళ్యాణలక్ష్మి, షాదీ ముబారక్ వంటి ప్రభుత్వ సంక్షేమ పథకాల కింద ఆర్థిక సహాయం పొందేందుకు నకిలీ ధృవీకరణ పత్రాలు తయారు చేస్తున్న ముఠాను కామారెడ్డి పోలీసులు ఛేదించారు. ఈ కేసులో ముగ్గురు నిందితులను అరెస్ట్ చేసి, వారి వద్ద నుంచి నకిలీ అధికారిక రబ్బరు ముద్రలు, కంప్యూటర్ పరికరాలు, మొబైల్ ఫోన్లు, డిజిటల్ రికార్డులు తదితర నేర సంబంధిత వస్తువులను స్వాధీనం చేసుకున్నారు. ఈ వివరాలను జిల్లా ఎస్పీ ఎం. రాజేష్ చంద్ర వెల్లడించారు. ప్రభుత్వ సంక్షేమ పథకాలను దుర్వినియోగం చేసేందుకు ప్రయత్నించే వారిపై కఠిన చర్యలు తీసుకుంటామని ఆయన తెలిపారు. కామారెడ్డి ప్రభుత్వ జిల్లా ఆసుపత్రిలో ఆర్‌ఎంఓగా విధులు నిర్వహిస్తున్న డాక్టర్ చందారి సంతోష్ తన పేరుతో, అధికారిక హోదాతో జారీ చేసినట్లుగా కనిపించే వయస్సు ధృవీకరణ పత్రాలు, మొదటి వివాహ ధృవీకరణ పత్రాలపై తనకు ఎలాంటి సంబంధం లేకుండా నకిలీ సంతకాలు చేయడంతో పాటు తన అధికారిక రబ్బరు ముద్రను దుర్వినియోగం చేస్తున్నారని పోలీసులకు ఫిర్యాదు చేశారు. ఈ నకిలీ పత్రాలను కళ్యాణలక్ష్మి, షాదీ ముబారక్ పథకాల కింద ఆర్థిక సహాయం పొందేందుకు ఉపయోగిస్తున్నట్లు ఫిర్యాదులో పేర్కొన్నారు. ఫిర్యాదు మేరకు కేసు నమోదు చేసిన పోలీసులు దర్యాప్తు ప్రారంభించారు. జిల్లా ఎస్పీ ఆదేశాల మేరకు కామారెడ్డి డీఎస్పీ మధుసూదన్ పర్యవేక్షణలో కామారెడ్డి టౌన్ పోలీస్ స్టేషన్ ఎస్‌హెచ్‌ఓ నరహరి ఆధ్వర్యంలో ప్రత్యేక దర్యాప్తు బృందాలను ఏర్పాటు చేశారు. పోలీసులు సాంకేతిక ఆధారాలు, సంబంధిత పత్రాలు, డిజిటల్ రికార్డులను పరిశీలిస్తూ దర్యాప్తు చేపట్టారు. ఈ క్రమంలో లభించిన విశ్వసనీయ సమాచారం ఆధారంగా భిక్కనూర్ గ్రామంలోని లహరి జిరాక్స్ అండ్ ఆన్‌లైన్ సెంటర్‌లో తనిఖీలు నిర్వహించారు. అనంతరం ఈ నేరంలో ప్రమేయం ఉన్న ముగ్గురు నిందితులను అదుపులోకి తీసుకుని విచారించగా, వారు నేరాన్ని అంగీకరించినట్లు పోలీసులు తెలిపారు. దర్యాప్తులో ప్రధాన నిందితులైన తోడెంగల రాజా నరేందర్, తోడెంగల రాజలింగం భిక్కనూర్‌లో నిర్వహిస్తున్న ఆన్‌లైన్ సేవా కేంద్రం ద్వారా కళ్యాణలక్ష్మి, షాదీ ముబారక్ పథకాల కోసం దరఖాస్తు చేసుకునే వ్యక్తుల నుంచి వివాహ పత్రికలు, ఆధార్ కార్డులు, కుల, ఆదాయ, నివాస ధృవీకరణ పత్రాలు మరియు ఇతర అవసరమైన పత్రాలను సేకరించినట్లు వెల్లడైంది. ప్రతి దరఖాస్తుకు రూ.4,500 నుంచి రూ.5,000 వరకు సేవా రుసుము వసూలు చేసినట్లు పోలీసులు గుర్తించారు. అనంతరం ప్రభుత్వ జిల్లా ఆసుపత్రిలో ఔట్‌సోర్సింగ్ ఉద్యోగిగా పనిచేస్తున్న బోయిని ప్రసాద్‌తో కలిసి ప్రభుత్వ వైద్యాధికారుల అసలు సంతకాలు లేకుండానే వారి పేర్లతో నకిలీ సంతకాలు చేసి, నకిలీ అధికారిక రబ్బరు ముద్రలు ఉపయోగించి వయస్సు ధృవీకరణ పత్రాలు, మొదటి వివాహ ధృవీకరణ పత్రాలు, ఇతర అవసరమైన పత్రాలను తయారు చేసినట్లు దర్యాప్తులో బయటపడింది. ఈ నకిలీ పత్రాలను అసలైన ప్రభుత్వ ధృవీకరణ పత్రాలుగా చూపిస్తూ ఆన్‌లైన్‌లో దరఖాస్తులు సమర్పించి ప్రభుత్వ పథకాల ప్రయోజనాలను అక్రమంగా పొందే విధంగా వ్యవహరించినట్లు పోలీసులు తెలిపారు. ఈ కేసులో అరెస్టైన వారిలో తోడెంగల రాజా నరేందర్ (తండ్రి రాజలింగం), తోడెంగల రాజలింగం (తండ్రి రాజయ్య), బోయిని ప్రసాద్ (తండ్రి రామచంద్రం) ఉన్నారు. వీరంతా భిక్కనూర్ గ్రామం, మండలం, కామారెడ్డి జిల్లాకు చెందినవారిగా పోలీసులు తెలిపారు. నిందితులను అరెస్ట్ చేసి న్యాయస్థానం ముందు హాజరుపరచనున్నట్లు జిల్లా ఎస్పీ వెల్లడించారు. అక్రమంగా సమర్పించిన దరఖాస్తుల సంఖ్య, ప్రభుత్వానికి జరిగిన ఆర్థిక నష్టం, సంబంధిత లబ్ధిదారుల వివరాలు, ఈ వ్యవహారంలో మరెవరైనా ప్రమేయం ఉందా అనే కోణాల్లో దర్యాప్తు కొనసాగుతోందని తెలిపారు. పోలీసులు నిందితుల వద్ద నుంచి నేరానికి ఉపయోగించిన కంప్యూటర్ సీపీయూ, ఎల్‌సీడీ మానిటర్, కీబోర్డ్, మౌస్, మూడు మొబైల్ ఫోన్లు, నకిలీ అధికారిక రబ్బరు ముద్రలు, స్టాంప్ ప్యాడ్, నకిలీ సంతకాలకు ఉపయోగించిన పెన్నులు, కంప్యూటర్‌లో భద్రపరిచిన దరఖాస్తుల డిజిటల్ రికార్డులు, ఇతర నేర సంబంధిత వస్తువులను స్వాధీనం చేసుకున్నారు. సాంకేతిక ఆధారాల సహాయంతో కేసును ఛేదించి నిందితులను అరెస్ట్ చేసిన కామారెడ్డి డీఎస్పీ మధుసూదన్, కామారెడ్డి టౌన్ పోలీస్ స్టేషన్ ఎస్‌హెచ్‌ఓ నరహరి, పోలీసు సిబ్బందిని జిల్లా ఎస్పీ ఎం. రాజేష్ చంద్ర అభినందించారు.