​ఎల్లారెడ్డిపల్లిలో ఘోర అగ్నిప్రమాదం

. . . ఇల్లు పూర్తిగా దగ్ధం

. . . 2 లక్షల నగదు, బంగారం, అగ్నికి ఆహుతి

. . . కట్టుబట్టలతో రోడ్డున పడ్డ కూలీ కుటుంబం

. . . ఆదుకోవాలని గ్రామస్తుల డిమాండ్

​ఇందల్వాయి, బతుకమ్మ :

ఇందల్వాయి మండలం ఎల్లారెడ్డిపల్లి గ్రామంలో బుధవారం ఉదయం విద్యుత్ షార్ట్ సర్క్యూట్‌ కారణంగా ఘోర అగ్నిప్రమాదం సంభవించింది. ఈ ప్రమాదంలో మేదరి నర్సయ్య అనే కూలీ అద్దెకు ఉంటున్న నివాస గృహం పూర్తిగా తగలబడింది. ​బాధిత కుటుంబం, గ్రామస్తులు తెలిపిన వివరాల ప్రకారం మేదరి నర్సయ్య, ఆయన భార్య ఇద్దరూ కూలి పనులు చేసుకుంటూ తమ ముగ్గురు చిన్న పిల్లలను పోషించుకుంటున్నారు. ఎప్పటిలాగే బుధవారం ఉదయం నర్సయ్య కూలి పనికి వెళ్ళాడు. ఆ సమయంలో ఆయన భార్య ఇంటి బయట పిల్లలకు స్నానం చేయిస్తోంది. ఒక్కసారిగా ఇల్లాలు గమనించేసరికి ఇంటో నుంచి భారీగా పొగలు, మంటలు వ్యాపించాయి. కంగుతిన్న ఆమె కేకలు వేయడంతో స్థానికులు పరుగున వచ్చారు. ఈ ప్రమాదంలో ఇంట్లో ఉన్న నిత్యావసర సరుకులు, వంట సామాగ్రి, బట్టలు, బంగారంతో పాటు వచ్చే నెల 1వ తేదీన చిట్టీ డబ్బులు చెల్లించడం కోసం తెచ్చి పెట్టుకున్న రూ. 2 లక్షల నగదు పూర్తిగా అగ్నికి ఆహుతయ్యాయి. కంటి ముందే సర్వస్వం కాలిపోవడంతో ఆ కుటుంబం కట్టుబట్టలతో రోడ్డున పడింది. ప్రమాద తీవ్రతకు సర్వస్వం కోల్పోయి అనాథలుగా మారిన మేదరి నర్సయ్య కుటుంబాన్ని ప్రభుత్వం తక్షణమే స్పందించి, ఆర్థికంగా ఆదుకోవాలని ఎల్లారెడ్డిపల్లి గ్రామస్తులు విజ్ఞప్తి చేస్తున్నారు.