నిజామాబాద్ సిటీ, బతుకమ్మ :
నిజామాబాద్ ప్రభుత్వ జనరల్ ఆసుపత్రి ఎదుట తెలంగాణ మెడికల్ కాంట్రాక్ట్ ఎంప్లాయిస్ అండ్ వర్కర్స్ యూనియన్ (ఏఐటీయూసీ అనుబంధం) ఆధ్వర్యంలో శుక్రవారం ధర్నా నిర్వహించారు. ఈ సందర్భంగా యూనియన్ జిల్లా అధ్యక్షులు పి.సుధాకర్ మాట్లాడుతూ జిజిహెచ్ ఆసుపత్రి మరియు జిల్లాలోని ప్రభుత్వ ఆసుపత్రులలో పనిచేస్తున్న శానిటేషన్, పేషంట్ కేర్, సెక్యూరిటీ సిబ్బంది ఎదుర్కొంటున్న సమస్యలు వెంటనే పరిష్కరించాలని, థర్డ్ పార్టీ, కాంట్రాక్ట్ విధానాన్ని రద్దు చేసి కార్పోరేషన్ ఏర్పాటు చేయడంతో పాటు కార్మికులందరికీ సమాన పనికి సమాన వేతనం చెల్లించాలని, ఆసుపత్రులలో కార్మికుల సంఖ్యను పెంచాలని ఈనెల 12 నుండి 28 వరకు నిరసన కార్యక్రమాలు నిర్వహిస్తున్నామన్నారు. సమస్యలను పరిష్కారం చేయకపోతే సమ్మె నిర్వహించక తప్పదని అన్నారు. ఈ ధర్నా కార్యక్రమంలో యూనియన్ నాయకులు భాగ్యలక్ష్మి, హైమది, స్వరూప, సాయి తదితర కార్మికులు పాల్గొన్నారు.