ముబారక్ నగర్ లో ముసురుకున్న విష జ్వరాలు

• ఇబ్బందులు పడుతున్న ప్రజలు
• పత్తాలేని వైద్యాధికారులు

బతుకమ్మ, నిజామాబాద్ సిటీ :  నిజామాబాద్ నగర శివారులోని ముబారక్ నగర్ లో ఇప్పుడు ఎక్కడ చూసినా ఏ కుటుంబంలో చూసిన విష జ్వరాలతో ప్రజలు శతమతమవుతున్నారు. దీంతో బాధితుల సంఖ్య రోజుకు ఎక్కువవుతుంది. వీటిని అదుపు చేయడంలో వైద్య ఆరోగ్యశాఖ అధికారులు విఫలమయ్యారని ఆరోపణలు వినిపిస్తున్నాయి. సుమారు పదివేల జనాభా కలిగిన ఆ డివిజన్లో ఇప్పటివరకు ప్రభుత్వాలు కనీసం ప్రాథమిక ఆరోగ్య కేంద్రాలు నిర్మించకపోవడం విశేషం. గత ప్రభుత్వం బస్తీ దవఖాన లాంటి ఆస్పత్రులు వివిధ డివిజన్లలో ఏర్పాటు చేసినప్పటికీ ఇక్కడ మాత్రం ఏర్పాటు చేయలేదు. అక్కడక్కడ ఎప్పుడూ ఓసారి వైద్యాధికారులు గ్రామాల్లో ఆరోగ్య శిబిరాలు ఏర్పాటు చేసి ప్రజలకు అవగాహన కల్పిస్తున్నారు తప్ప క్షేత్రస్థాయిలో ఉంటూ ఆరోగ్య కేంద్రాలు ఏర్పాటు చేసి వారికి సరైన వైద్యం అందడం లేదని విమర్శలు వినిపిస్తున్నాయి. ప్రజలకు ఎలాంటి చిన్న జ్వరం, కాళ్ల నొప్పులు ఇతర ఆరోగ్య సమస్యలు వస్తే జనరల్ ప్రభుత్వ ఆసుపత్రికి గాని, గౌతమ్ నగర్, చంద్రశేఖర్ కాలనీ ప్రభుత్వ ఆసుపత్రులకు వెళ్ళాల్సిన పరిస్థితి దాపురించింది. అక్కడికి వెళ్ళని వారు ఆర్ఎంపీలను ఆశ్రయిస్తూ వారి వద్ద చికిత్స తీసుకుంటున్నారు. అప్పుడప్పుడు వైద్యాధికారులు ఆరోగ్య శిబిరాలు ఏర్పాటు చేసినప్పటికీ పారాసెటిమల్, డోలా 650 టాబ్లెట్లు ఇచ్చి చేతులు దులుపుకుంటున్నారు. అసలే డెంగ్యూ, చికున్ గున్యా, లాంటి విష జ్వరాలతో వణికి పోతున్న ప్రజలు తమకు ఎప్పుడు ఏమవుతుందోనని మంచాలకే పరిమితమైతున్నారు. ఒక విధంగా చెప్పాలంటే ముబారక్ నగర్ లో ప్రతి ఇంట్లో ఒకరికిద్దరికి విష జ్వరాలు అంటే పరిస్థితి ఎంత తీవ్రంగా ఉందో అర్థం చేసుకోవచ్చు. ఇక చిన్న పిల్లలు, వృద్ధుల పరిస్థితి మరీ ఘోరంగా తయారైంది. తమ దగ్గరికి ఏ ఆశా వర్కర్లు, హెల్త్ ఆఫీసర్లు వచ్చి సర్వేలు చేయడం లేదని అసహనం వ్యక్తం చేస్తున్నారు. ప్రభుత్వానికి అధికారులకు లెక్క లేదా అని ముబారక్ నగర్ వాసులు వాపోతున్నారు. ఎవరైనా ప్రాణాలు పోయేవరకు అధికారులు స్పందించరా అని వారు ప్రశ్నిస్తున్నారు. ముబారక్ నగర్ ఒకటే కాదు జిల్లాలో ఏ గ్రామంలో చూసిన ప్రజలు విష జ్వరాలతో తల్లదిల్లుతున్నారు. ఇప్పటికైనా జిల్లా కలెక్టర్ జిల్లా వైద్య ఆరోగ్యశాఖ ఆదేశాలు జారీ చేస్తే గ్రామాలలో విష జ్వరాల బారిన ఎంతోమంది పడ్డారో ఒక సర్వే చేపిస్తే జ్వరాలను కొంతైనా నియంత్రించవచ్చని, పరిస్థితి చేయి జారిపోకుండా చూడాల్సిన బాధ్యత జిల్లా బాస్ పైనే ఉంది.