నందిపేట్, బతుకమ్మ :
భారత రాష్ట్ర సమితి (బీఆర్ఎస్) వర్కింగ్ ప్రెసిడెంట్, మాజీ మంత్రి కేటీఆర్ జన్మదిన వేడుకలను నందిపేట్ మండలంలో ఘనంగా నిర్వహించారు. మాజీ ఎమ్మెల్యే జీవన్ రెడ్డి ఆదేశాల మేరకు బీఆర్ఎస్ నందిపేట్ మండల పార్టీ అధ్యక్షుడు మచ్చర్ల సాగర్ ఆధ్వర్యంలో పలు కార్యక్రమాలు చేపట్టారు. ఈ సందర్భంగా పలుగుట్ట కేదారేశ్వర ఆలయంలో ప్రత్యేక పూజలు, అభిషేక కార్యక్రమాలు నిర్వహించారు. కేటీఆర్ నిండు నూరేళ్లు ఆయురారోగ్యాలతో జీవించాలని, ప్రజాసేవలో మరింత ముందుకు సాగి భవిష్యత్తులో ఉన్నత స్థానాలను అధిరోహించాలని పార్టీ నాయకులు, కార్యకర్తలు ఆకాంక్షించారు. అనంతరం పార్టీ కార్యాలయంలో కేక్ కట్ చేసి జన్మదిన వేడుకలు నిర్వహించారు. కార్యకర్తలు పరస్పరం శుభాకాంక్షలు తెలుపుకుని మిఠాయిలు పంపిణీ చేశారు. అలాగే వివిధ ఆసుపత్రుల్లో రోగులకు పండ్లు పంపిణీ చేసి సేవా కార్యక్రమాలు చేపట్టారు. ఈ కార్యక్రమంలో నందిపేట్ మండలానికి చెందిన బీఆర్ఎస్ సీనియర్ నాయకులు, కార్యకర్తలు, ప్రజాప్రతినిధులు పెద్ద సంఖ్యలో పాల్గొన్నారు.